కొన్ని కొన్ని సంఘటనలు వింటుంటే.. అవునా.. ఇలా జరిగిందా అంటూ మనం ఆశ్చర్యం వ్యక్తం చేస్తుంటాం. అలాంటిది మన అభిమాన హీరోల విషయాలు అయితే మాత్రం ఎక్కడ లేని ఆత్రుత ఉంటుంది. ఇలాంటి ఘటన ఒకటి మెగస్టార్ చిరంజీవికి జరిగింది. అదేంటంటే.. అత్యధిక చిత్రాల్లో నాయికగా నటించిన తార రాధికతో చిరంజీవి కాంబినేషన్ లో 28 సినిమాల వరకు వచ్చాయి. అప్పటి నుంచే వీరి మధ్య స్నేహం కొనసాగుతోంది.
అయితే చిరంజీవి చెన్నై వెళ్లినా.. రాధిక హైదరాబాద్ వచ్చినా ఆతిథ్యం ఇస్తుంటారు. అంతటి సన్నిహితత్వం ఆ ఇద్దరి మధ్యా ఉంది. వారి సినిమాల్లో అతి పెద్ద హిట్ అయిన సినిమా అభిలాష. అయితే ఈ సినిమా సమయంలో వీరిద్దరి మధ్య ఏదో జరిగి .. ఒకరికొకరు మాట్లాడుకునే వారు కాదంట. దర్శకుడు పిలిస్తే వెళ్లి.. ఆయన చెప్పింది చేసి ఎవరి దారి వాళ్లు చూసుకునే వారంట. ఈ సినిమాలో పాటలు ఎంత పెద్ద హిట్ అయ్యాయో పెద్దగా చెప్పాల్సిన పని లేదు.
ఆ పాటల్లో వారి మధ్య కెమిస్ట్రీ చూస్తే వాళ్ల మధ్య మాటలు లేవని ఎవరూ అనుకోరు. అయితే నవ్వింది మల్లెచెండు పాటలో ఓ అనూహ్య సంఘటన ఎందురైంది. దానిని వైజాగ్ బీచ్ దగ్గర్లో షూట్ చేశారు. అక్కడ జనం మధ్యలో పాట చిత్రీకరిస్తుండగా.. “యురేకా సకమిక” అంటూ రాధిక పైనుంచి దూకే షాట్ అది. అయితే చిరంజీవి ఆ షాట్ ను చేసి.. పైనుంచి దూకి ఇసుకలోనే పడి ఉండిపోయారు. షాట్ బాగానే వచ్చింది. తర్వాత సీన్ కు ఓకె అవుతున్నారు అందరు. కానీ చిరంజీవి మాత్రం ఆ ఇసుకలో నుంచి లేవలేదు. రాధికను అప్పుడు చిరంజీవి “ఎక్స్క్యూజ్ మీ” అన్నారు.
నన్ను పిలిచారా అంటూ రాధిక అడిగింది. అవును జంప్ చేసినప్పుడు ప్యాంట్ చిరిగిపోయింది. నేను లేవలేను. చుట్టూ ఫ్యాన్స్ ఉన్నారు.. సహాయం చేయండి అంటూ చిరంజీవి అనగా.. తనకు సారీ చెబితే సహాయం చేస్తానంటూ రాధిక చెప్పింది. జంప్ చేసే సీన్ కాబట్టి చిత్ర బృందం చాలా దూరంలో ఉన్నారు. ఎట్టకేలకు సారీ చెప్పాక.. తన చీర కొంగు అడ్డుతో చిత్ర బృందం దగ్గరకు తీసుకెళ్లింది రాధిక. ఆ తర్వాత సీన్ నుంచి మళ్లీ వాళ్లిద్దరు మాట్లాడుకుంటూ.. చిత్రాన్ని ముందుకు నడిపించారు. ఈ ఘటన గురించి రాధిక ఓ ఇంటర్వ్యూలో చెప్పుకొచ్చారు.
