చికెన్ అంటే చాలా మందికి ముందుగా గుర్తొచ్చేది లెగ్ పీస్, బ్రెస్ట్ పీస్ లేదా లివర్. కానీ కోడి కాళ్లను మాత్రం చాలామంది పెద్దగా పట్టించుకోరు. కొన్ని ప్రాంతాల్లో అయితే అవి పనికిరావని భావించి పక్కన పడేస్తుంటారు. అయితే ప్రపంచంలోని కొన్ని దేశాల్లో మాత్రం కోడి కాళ్లకు ప్రత్యేకమైన డిమాండ్ ఉంది. ముఖ్యంగా చైనా, వియత్నాం, సింగపూర్, మెక్సికో వంటి దేశాల్లో వీటిని ఎంతో ఇష్టంగా తింటారు. సాధారణ చికెన్ కంటే కోడి కాళ్ల ధర ఎక్కువగా ఉండే సందర్భాలు కూడా ఉన్నాయి.
ఆహార నిపుణుల ప్రకారం, కోడి కాళ్లలో శరీరానికి ఉపయోగపడే పలు ముఖ్యమైన పోషకాలు ఉంటాయి. ముఖ్యంగా కొల్లాజెన్ అనే ప్రోటీన్ అధికంగా లభిస్తుంది. వయసు పెరిగే కొద్దీ శరీరంలో కొల్లాజెన్ స్థాయి తగ్గిపోతుంది. దీని కారణంగా చర్మం పొడిబారడం, ముడతలు రావడం, కీళ్ల నొప్పులు వంటి సమస్యలు ఎదురవుతాయి. కోడి కాళ్లలో ఉండే కొల్లాజెన్ చర్మం, ఎముకలు, కండరాలకు మేలు చేస్తుందని నిపుణులు చెబుతున్నారు.
ఇందులో ప్రోటీన్తో పాటు కాల్షియం, ఫాస్ఫరస్, ఫోలేట్, మంచి కొవ్వులు కూడా ఉంటాయి. ఇవి ఎముకలను బలంగా ఉంచడంలో సహాయపడతాయి. అలాగే శరీరంలోని కండరాల పనితీరును మెరుగుపరచడంలో కూడా ఉపయోగపడతాయి. కొందరు డైటీషియన్ల అభిప్రాయం ప్రకారం, కోడి కాళ్లతో తయారుచేసిన సూప్ జీర్ణక్రియకు కూడా సహాయపడుతుంది.
అయితే వీటిని వండే ముందు సరైన శుభ్రత చాలా ముఖ్యం. కోడి కాళ్లపై మట్టి, మలినాలు ఉండే అవకాశం ఉండటంతో వేడి నీటిలో బాగా కడిగి, పై పొర తొలగించిన తర్వాత మాత్రమే వాడాలి. సూప్ లేదా తక్కువ మసాలాలతో కూర రూపంలో తీసుకోవడం మంచిదని నిపుణులు సూచిస్తున్నారు.
డీప్ ఫ్రై చేసి తినడం మాత్రం ఆరోగ్యానికి మంచిది కాదని వైద్యులు హెచ్చరిస్తున్నారు. ఎక్కువ నూనెతో వండితే ట్రాన్స్ ఫ్యాట్స్, సోడియం పెరిగి గుండె ఆరోగ్యంపై ప్రభావం చూపే ప్రమాదం ఉంటుంది. అందుకే పరిమిత మోతాదులో, ఆరోగ్యకరమైన విధంగా తీసుకోవడం మంచిదని చెబుతున్నారు.
గర్భిణీ మహిళలకు ఇందులో ఉండే ఫోలేట్ కొంతవరకు ఉపయోగపడొచ్చని నిపుణులు చెబుతున్నప్పటికీ, ఎలాంటి ఆహారం అయినా వైద్యుల సలహాతో తీసుకోవడం ఉత్తమం. అలాగే చిన్నపిల్లలు, వృద్ధులు లేదా మింగడంలో ఇబ్బంది ఉన్నవారికి కోడి కాళ్లు ఇవ్వడంలో జాగ్రత్త అవసరం.
