గౌహతి: త్రిపుర రాజధాని అగర్తలలో జరిగిన ఒక హృదయ విదారక సంఘటన కలకలం రేపుతోంది. ఇంద్రానగర్ ప్రాంతానికి చెందిన సరిఫుల్ ఇస్లాం అనే యువకుడు కనిపించకుండా పోవడంతో పోలీసులు గాలింపు చర్యలు చేపట్టారు. చివరికి అతని మృతదేహం ఐస్క్రీమ్ ఫ్రీజర్లో కనుగొనబడటంతో విషాదం నెలకొంది. ఈ కేసులో ముగ్గురి మధ్య నడిచిన ప్రేమ వ్యవహారమే హత్యకు దారితీసిందని పోలీసులు అనుమానిస్తున్నారు.
వివరాల్లోకి వెళితే..
సరిఫుల్ ఇస్లాం (20) అగర్తల స్మార్ట్ సిటీ మిషన్ ప్రాజెక్ట్లో ఎలక్ట్రీషియన్గా పనిచేసేవాడు. అదే సమయంలో, దిబాకర్ సాహా (28) అనే వైద్యుడు, మరొక మహిళతో సరిఫుల్కు సంబంధం ఉందని తెలుస్తోంది. ఈ ట్రయాంగిల్ లవ్ స్టోరీ విషాదకరమైన ముగింపుకు దారితీసింది.
జూన్ 8న, దిబాకర్ సాహా సరిఫుల్ను సౌత్ ఇంద్రానగర్లోని కబర్ఖలా ప్రాంతానికి రమ్మని చెప్పాడు. అక్కడ జోరుదీప్ దాస్ (20) అనే వ్యక్తి ఇంట్లో బహుమతి ఇస్తానని ఆశ చూపాడు. సరిఫుల్ అక్కడికి చేరుకున్న వెంటనే దిబాకర్, అతని స్నేహితులు అనిమేష్ యాదవ్ (21), నబనితా దాస్ (25) కలిసి అతనిపై దాడి చేసి హత్య చేశారు. ఆ తర్వాత మృతదేహాన్ని ట్రాలీ బ్యాగ్లో ప్యాక్ చేశారు.
మరుసటి రోజు ఉదయం, దిబాకర్ తన తల్లిదండ్రులు దీపక్, దేబికా సాహాలతో కలిసి గండచెర్రా నుండి అగర్తలాకు మృతదేహం ఉన్న ట్రాలీ బ్యాగ్ను తరలించాడు. అనంతరం గండచెర్రా మార్కెట్లోని వారి దుకాణంలో ఉన్న ఐస్క్రీమ్ ఫ్రీజర్లో దాచారు.
పోలీసుల దర్యాప్తు
ఈ కేసును పోలీసులు సీరియస్గా తీసుకుని దర్యాప్తు చేపట్టారు. మొబైల్ మెసేజ్ల ఆధారంగా అసలు విషయం తెలుసుకున్నారు. రోజుల వ్యవధిలోనే కేసును ఛేదించారు. మంగళవారం రాత్రి ఆరుగురు నిందితులను అరెస్టు చేశారు. బుధవారం మధ్యాహ్నం సరిఫుల్ ఇస్లాం మృతదేహాన్ని స్వాధీనం చేసుకున్నారు. అరెస్టు చేసిన వారందరినీ గురువారం కోర్టు ముందు హాజరుపరచనున్నారు.
ఈ ఘటన స్థానికంగా తీవ్ర దిగ్భ్రాంతిని కలిగించింది. ప్రేమ పేరుతో జరిగిన ఈ దారుణ హత్య అందరినీ కలచివేసింది. పోలీసులు నిందితులకు కఠిన శిక్ష పడేలా చర్యలు తీసుకుంటామని తెలిపారు.
