సూరత్, గుజరాత్: సమాజంలో మానవ సంబంధాలు వేగంగా మారిపోతున్నాయి. ఒకప్పుడు ప్రేమ, ఆప్యాయతలతో నిండిన సంబంధాలు ఇప్పుడు ఎక్కువగా డబ్బు, పగతో ముడిపడి ఉన్నాయి. ఇదే కోవలో గుజరాత్లోని సూరత్లో ఒక విచిత్రమైన సంఘటన జరిగింది. తన కొడుకుతో విడాకులు తీసుకున్న కోడలిపై పగబట్టిన మామ, ఆమెను ఇరికించాలని చూసి చివరకు తానే చట్టపరమైన ఇబ్బందుల్లో చిక్కుకున్నాడు.
ఫ్రెండ్షిప్ డే నాడు ఘటన
కొడుకు, కోడలు విడాకులు తీసుకోవడంతో బాధ, కోపంతో ఉన్న ఆ మామ, కోడలిపై నిఘా పెట్టాలని నిర్ణయించుకున్నాడు. ఆమె ఎక్కడికి వెళ్తోంది, ఏమి చేస్తోందో తెలుసుకోవడానికి ఏకంగా ఆమె ఫోన్ను హ్యాక్ చేశాడు. ఫ్రెండ్షిప్ డే రోజున కోడలు తన స్నేహితులతో కలిసి ఒక హోటల్లో మద్యం పార్టీ చేసుకుంటున్నారని తెలుసుకున్న మామ, వెంటనే పోలీసులకు ఫిర్యాదు చేశాడు.
అనుకోని ట్విస్ట్
సమాచారం అందుకున్న పోలీసులు హోటల్కు వెళ్లి, అక్కడ మద్యం సేవిస్తున్న యువతులను, యువకులను అదుపులోకి తీసుకున్నారు. అయితే ఈ సమాచారం ఎవరు ఇచ్చారన్నది వారికి మొదట అర్థం కాలేదు. విచారణలో, కోడలిపై పగబట్టి ఆమెను రహస్యంగా గమనించింది ఆమె మామేనని తెలిసింది. ఒకరి వ్యక్తిగత విషయాలను రహస్యంగా తెలుసుకోవడం చట్టరీత్యా నేరం అని పోలీసులు గుర్తించారు. దీంతో కోడలితో పాటు ఆ మామపై కూడా పోలీసులు కేసు నమోదు చేశారు. కోడలిని ఇరికించాలని చూసిన మామ చివరికి తానే చట్టపరమైన చిక్కుల్లో పడడం ప్రస్తుతం గుజరాత్ వ్యాప్తంగా చర్చనీయాంశంగా మారింది.
