వాతావరణంలో మార్పులు చోటు చేసుకోవడం వల్ల చాలామంది శరీరంలో కూడా పెద్దఎత్తున మార్పులు చోటుచేసుకుంటాయి. కొందరికి చలికాలంలో కూడా శరీరంలో ఎక్కువగా వేడి ఉండటం వల్ల అనేక సమస్యలతో సతమతమవుతుంటారు. శరీరంలో వేడి ఎక్కువగా ఉండటం ద్వారా శరీరం పై పొక్కులు ఏర్పడటం, నోట్లో పుండ్లు ఏర్పడటం, చెమట కాయలు, ముక్కు ద్వారా రక్తం కారడం,తరచూ వళ్ళు వేడి అవుతూ జ్వరం వచ్చినట్లు అనిపిస్తుంది. అయితే శరీరంలో అధిక వేడి వల్ల సతమతమయ్యేవారు వారి ఆహార విషయంలో కొన్ని మార్పులు చేసుకోవడం ద్వారా శరీరంలో వేడిని కొంత వరకు తగ్గించుకోవచ్చని నిపుణులు చెబుతున్నారు.
శరీరంలో వేడి ఎక్కువగా ఉన్నవారు వీలైనంత వరకు నీటి శాతం అధికంగా ఉన్న ఆహార పదార్థాలను తీసుకోవాలి. అలాగే రాత్రి పడుకునే సమయంలో పెరుగన్నం తప్పకుండా తీసుకోవాలి. వీలైతే ఒక గ్లాసు పలుచటి మజ్జిగను తాగడం ద్వారా శరీర వేడిని కొంతవరకు తగ్గించవచ్చు. అలాగే నీటిశాతం అధికంగా ఉన్న పుచ్చకాయ, కీర దోసకాయ, దానిమ్మ వంటి పండ్లను తరచూ తీసుకోవడం వల్ల శరీర ఉష్ణోగ్రతలు తగ్గుతాయి.
ఈ సమస్య తగ్గాలంటే నీటిలో మెంతుల పొడి వేసుకుని తాగటం ద్వారా మన శరీరంలో వేడిని తగ్గించుకోవచ్చు. కొంతమందిలో ఈ వేడి ఉండటంవల్ల మలబద్ధకం సమస్యతో బాధపడుతుంటారు. అలాంటి వారు పీచు పదార్థాలను ఎక్కువగా తీసుకోవాలి. వీలైనంత వరకు చల్లటి గాలి తగిలే ప్రదేశాలలో ఉండటం వల్ల ఈ సమస్య నుంచి తొందరగా ఉపశమనం పొందవచ్చు. ఈ పద్ధతులన్నీ పాటించినప్పటికీ కూడా వారిలో ఏ మాత్రం మార్పు రాకపోతే వైద్యుని సంప్రదించడం ఎంతో ఉత్తమం.
