ప్రయాగ్రాజ్, ఉత్తరప్రదేశ్: త్రివేణీ సంగమ క్షేత్రం ప్రయాగ్రాజ్ సమీపంలో ఉన్న ప్రసిద్ధ బడే హనుమాన్ ఆలయాన్ని వరద నీరు ముంచెత్తింది. దీంతో ఈ ఆలయాన్ని తాత్కాలికంగా మూసివేశారు. గంగ, యమున, సరస్వతి నదుల సంగమ ప్రాంతమైన ప్రయాగ్రాజ్లో త్రివేణీ సంగమ స్నానం ఆచరించిన భక్తులు ఈ ఆలయాన్ని తప్పనిసరిగా దర్శించుకుంటారు. ఇక్కడ హనుమంతుడిని దర్శించుకోకపోతే గంగా స్నానం అసంపూర్ణంగా పరిగణించబడుతుందని భక్తుల విశ్వాసం.
గత కొన్ని రోజులుగా గంగా, యమునా నదులలో నీటి మట్టాలు గణనీయంగా పెరుగుతూ ఉండటంతో ప్రయాగ్రాజ్, వారణాసితో సహా ఉత్తరప్రదేశ్లోని అనేక నగరాల్లో హెచ్చరికలు జారీ చేయబడ్డాయి. ప్రయాగ్రాజ్లో గంగా, యమునా నదుల్లోని నీటి మట్టాలు పెరగడంతో వరద నీరు బడే హనుమాన్ ఆలయ ప్రాంగణంలోకి ప్రవేశించింది. ముఖ్యంగా హనుమంతుడి శయనించిన విగ్రహం నీటిలో మునిగిపోవడంతో ఆలయాన్ని తాత్కాలికంగా మూసివేశారు.
భక్తి, ప్రకృతి కలయిక: శ్రావణ మాసంలో ప్రత్యేక దృశ్యం
హిందూ సంప్రదాయంలో అత్యంత పవిత్రమైన శ్రావణ మాసం (ఉత్తరాది వారికి) మొదటి మంగళవారం నాడు, భక్తి, ప్రకృతి శక్తితో కలిసే అద్భుతమైన దృశ్యం కనిపించింది. నీటి ప్రవాహం పెరుగుతున్నప్పటికీ ఆలయ పూజారులు హారతి, అభిషేకం వంటి పవిత్ర ఆచారాలను నిర్వహించారు.
సోమవారం రెండు నదుల నుంచి వచ్చిన నీరు ఆలయ కారిడార్ ముందున్న రహదారిని ముంచెత్తింది. మంగళవారం మధ్యాహ్నం నాటికి బడే హనుమాన మందిర కారిడార్కు వెళ్లే రహదారి పూర్తిగా వరద నీటితో నిండిపోయింది. ప్రత్యక్ష సాక్షుల ప్రకారం, మధ్యాహ్నం 2:30 గంటలకు ఆలయ మెట్లపై నుంచి నీరు ప్రవహించడం ప్రారంభించి, హనుమంతుడి శయన విగ్రహాన్ని ముంచెత్తింది. దీంతో ఆలయ ప్రధాన గదిని సాధారణ ఆచారాల కోసం మూసివేశారు. వరద నీరు తగ్గే వరకు పూజ కోసం ఆలయం పైన హనుమంతుడి చిన్న విగ్రహాన్ని ఉంచారు.
“మహాస్నానం” లేదా దేవుళ్ళకు నిర్వహించే పవిత్ర స్నానం అని పిలువబడే ఈ పవిత్ర కార్యక్రమాన్ని చూసేందుకు భారీ సంఖ్యలో భక్తులు ఆలయం వద్దకు చేరుకున్నారు.
ముందుగానే వచ్చిన వరదలు
సర్వసాధారణంగా ఆగష్టు నెలలో గంగా, యమున నదుల వరద నీరు బడే హనుమాన్ ఆలయానికి చేరుకుంటాయి. అయితే ఈ ఏడాది ముందుగానే, అంటే జూలై నెల మధ్యలోనే వరదనీరు ఆలయంలోకి ప్రవేశించడం గమనార్హం.
గంగా, యమునా నదుల ప్రస్తుత పరిస్థితి
ఉత్తరప్రదేశ్లోని సంభాల్ జిల్లాలో గంగా నది ప్రస్తుతం 177.60 మీటర్ల నీటి మట్టం వద్ద ప్రవహిస్తోంది. జిల్లా యంత్రాంగం అప్రమత్తంగా ఉందని, 16 వరద నియంత్రణ పోస్టులను ఏర్పాటు చేసిందని, అలాగే ప్రభావిత ప్రాంతాల్లో 13 షెల్టర్ హోమ్లను ఏర్పాటు చేసినట్లు సంభాల్ జిల్లా మేజిస్ట్రేట్ రాజేందర్ పెన్సియా తెలిపారు.
