వేసవి కాలం వచ్చిందంటే చాలు చెమట, ఉక్కపోత, చర్మ సమస్యలు వెంటాడటం సాధారణమే. ముఖ్యంగా ఇటీవల ఫంగల్ ఇన్ఫెక్షన్ల కేసులు ఎక్కువగా నమోదవుతున్నాయని చర్మవ్యాధి నిపుణులు చెబుతున్నారు. అధిక వేడి, తేమ కారణంగా చర్మంపై ఫంగస్ వేగంగా పెరిగే అవకాశం ఉండటంతో చాలా మంది దద్దుర్లు, దురద, చర్మం ఎర్రబడటం వంటి సమస్యలతో ఆస్పత్రులను ఆశ్రయిస్తున్నారు.
డాక్టర్ల ప్రకారం, రోజువారీ జీవితంలో చేసే కొన్ని చిన్న పొరపాట్లు ఈ సమస్యను మరింత తీవ్రతరం చేస్తున్నాయి. ముఖ్యంగా చెమట పట్టిన బట్టలను గంటల తరబడి మార్చకుండా ధరించడం, తడిగా ఉన్న దుస్తులు వేసుకోవడం, ఒకరి తువ్వాలు మరొకరు ఉపయోగించడం వంటి అలవాట్లు ఫంగల్ ఇన్ఫెక్షన్లకు ప్రధాన కారణాలుగా మారుతున్నాయి.
చాలామంది చర్మంపై దురద లేదా ఎర్రటి మచ్చలు కనిపించగానే మెడికల్ షాప్లో దొరికే స్టెరాయిడ్ క్రీములను వాడేస్తుంటారు. అయితే ఇది సమస్యను తగ్గించకుండా మరింత లోపలికి వ్యాపించేలా చేస్తుందని నిపుణులు హెచ్చరిస్తున్నారు. ఈ క్రీములు తాత్కాలిక ఉపశమనం ఇచ్చినా, శరీర సహజ రోగనిరోధక శక్తిని తగ్గించి ఫంగస్ పెరుగుదలకు దారితీస్తాయని వైద్యులు చెబుతున్నారు.
వేసవిలో సింథటిక్ దుస్తులు ఎక్కువసేపు ధరించడం కూడా ప్రమాదకరమని నిపుణులు సూచిస్తున్నారు. గాలి ఆడని బట్టలు చెమటను ఎక్కువసేపు చర్మంపైనే ఉంచడంతో ఫంగస్కు అనుకూల పరిస్థితులు ఏర్పడతాయి. అందుకే కాటన్ దుస్తులు ధరించడం మంచిదని సూచిస్తున్నారు. ముఖ్యంగా జిమ్కు వెళ్లేవారు లేదా బయట ఎక్కువసేపు పనిచేసేవారు చెమట పట్టిన వెంటనే స్నానం చేయడం అవసరమంటున్నారు.
అలాగే తలలో చుండ్రు, దురద సమస్యలు కూడా వేసవిలో పెరుగుతాయని వైద్యులు చెబుతున్నారు. అధిక తేమ, చెమట వల్ల తలపై ఫంగస్ పెరిగి చుండ్రు తీవ్రత పెరిగే అవకాశం ఉందని నిపుణులు వివరించారు. తలకు ఎక్కువగా ఆయిల్ రాసి రోజుల తరబడి శుభ్రం చేయకపోవడం కూడా సమస్యను పెంచుతుందని హెచ్చరిస్తున్నారు.
ఫంగల్ ఇన్ఫెక్షన్లను నివారించాలంటే వ్యక్తిగత పరిశుభ్రత చాలా ముఖ్యమని వైద్యులు చెబుతున్నారు. ప్రతిరోజూ స్నానం చేయడం, చెమట పట్టిన వెంటనే బట్టలు మార్చడం, లోదుస్తులను వేడి నీటితో ఉతకడం, తడిగా ఉన్న చెప్పులు లేదా సాక్స్ ఎక్కువసేపు వాడకపోవడం వంటి అలవాట్లు పాటించాలని సూచిస్తున్నారు.
ఇంట్లో ఎవరికైనా ఫంగల్ ఇన్ఫెక్షన్ ఉంటే వారి దుస్తులు, బెడ్షీట్లు, తువ్వాలను వేరుగా ఉతకడం మంచిదని నిపుణులు చెబుతున్నారు. సమస్య ఎక్కువకాలం కొనసాగితే స్వయంగా మందులు వాడకుండా తప్పనిసరిగా చర్మవ్యాధి నిపుణులను సంప్రదించాలని సూచిస్తున్నారు.
