రక్తం గ్రూపుని బట్టి వ్యక్తుల గుణగణాలు ఎలా ఉంటాయో తెలుసుకోండి.

0
905

వ్యక్తి తల రాతను బట్టి వ్యక్తిత్వాలు ఉంటాయని తెలుసు. ఆకారాన్ని బట్టి వ్యవహరిస్తారని తెలుసు. ఆఖరికి నిద్రపోయే విధానాన్ని బట్టి వారి వ్యక్తిత్వాలు ఉంటాయని కూడా తెలుసు. ఇక జోతిష్యం సంగతి కూడా తెలుసు కానీ రక్త వర్గాలను బట్టి వ్యక్తులుంటారా? కానీ ఇది నిజమనే చెప్తున్నారు నిపుణులు. అదికూడా పరిశోధనల ద్వారానే దీన్ని ధ్రువపరిచామని కూడా వారు తెలిపారు. కాబట్టి ప్రతి వ్యక్తికీ ఏదో ఒక కోణం.. ఆలోచనా విధానం ఉంటుంది. అలాగే వ్యక్తిగతంగా ఓ బ్లడ్‌గ్రూప్ కూడా ఉంటుంది. రక్తం చెప్పే మనస్తత్వాల గురించి ఏమాత్రం లేట్ చేయకుండా తెలుసుకుందామా…

ఆ బ్లడ్‌గ్రూప్‌లోని హిమోగ్లోబిన్ శాతమెంత? ప్లాస్మా పర్సెంటేజీ ఏంటీ? వంటి విషయాలు పక్కనబెడితే పర్సనాలిటీ.. మనసు కోణంలోనే ఆలోచిస్తే రక్తవర్గ చరిత్ర తెలుసుకోవచ్చు! మనలో చాలామంది దానగుణాలు చేసే వ్యక్తిత్వం కలవారుంటారు. ఇతరులను చూస్తే ఓర్వలేని వారుంటారు. ఒకరైతే వేరొకరి కోసం జీవితాన్నే త్యాగం చేసేవాళ్లు. మరొకరు ఎప్పటికీ.. ఎవ్వరికీ అర్థంకానివాళ్లు. ఇలా ఒక్కొక్కరిది ఒక్కో పరిస్థితి. ఈ చర్యలన్నీ శరీరంలో ప్రతిక్షణం సరఫరా అయ్యే ప్రతి రక్తం బొట్టుపై ఆధారపడి ఉంటుందనేదే ఆసక్తి.. ఆశ్చర్యం కలిగించే విషయం. అందుకే ఇవి తెలుసుకోవాలనే ఆసక్తి ఉండటంలో తప్పు లేదు!

బ్లడ్ గ్రూపులను బట్టి మనస్తత్వం ఉంటుందని మొదటగా జపనీయులు కనిపెట్టారు. ఈ విషయం శాస్త్రీయంగా ధ్రువపడ లేదు కానీ గణాంకాల ప్రకారం సరి అవుతున్నట్లు చెప్తున్నారు మానసిక.. పర్సనాలిటీ డెవలప్‌మెంట్ నిపుణులు. దక్షిణ కొరియాలో కూడా దీనికి చాలా ప్రాధాన్యత ఇస్తారు. అందుకే పెళ్లి సంబంధాలు.. ఉద్యోగాల విషయంలో రక్త వర్గాలను ప్రామాణికంగా పాటిస్తున్న దేశాలూ.. సంస్థలూ ఉన్నాయి! రక్తాన్ని బట్టి మనస్తత్వం ఎలా ఉంటుందో తెలుసుకుని ఆ పరంగా మనకు తెలిసిన వారి మనస్తత్వాన్ని పరిశీలిస్తుండటం సరదాగా అనిపిస్తుంది కదా!

క్రూరంగా ప్రవర్తించేవాళ్లను పచ్చినెత్తురు తాగేవాళ్లు అని అంటుంటారు. కానీ ఆయనది ఏ గ్రూపో తెలిస్తే తన క్రూరత్వాన్ని మార్చుకోవచ్చుగా అని ఆలోచించే.. రక్త వర్గాలపై కొన్నేళ్లుగా పరిశోధనలు చేస్తున్నారు. మనిషికి.. మనస్తత్వానికి ఇంత సంబంధం ఉన్నప్పుడు.. వాటికంత ప్రాధాన్యం ఉన్నప్పుడు కచ్చితంగా ఎవరికైనా తమ జాతకమేంటో తెలుసుకోవాలని ఉంటుంది. అయితే అంతకంటే ముందు రక్తంలో ఎన్ని వర్గాలు ఉంటాయి.. అసలు రక్తం అంటే ఏమిటో బ్రీఫ్‌గా తెలుసుకుందాం! ఇతిహాసాల్లో.. చరిత్రలో.. సాహిత్యంలోనూ రక్తం ప్రస్తావన ఉంది.

మహాభారతంలో ద్రౌపది వస్త్రాపరణ సందర్భంలో.. దుశ్శాసునుడి చంపి రక్తం తాగుతానని భీముడు.. ఆ నెత్తురును తల నూనెగా రాసుకుంటానని ద్రౌపది శపథం చేస్తారు! అంటే మనిషి రక్తానికి ఇచ్చే ప్రాధాన్యత ఏంటో ఇట్టే తెలిసిపోతుంది. రక్తంలో ఉండే ఎర్ర రక్తకణాలు, ప్లాస్మా, ప్లేట్టేట్స్ వేర్వేరు వ్యక్తుల్లో వేరుగా ఉంటాయి. రక్తంలో ముఖ్యంగా నాలుగు వర్గాలు ఉన్నాయి. ఏ, బీ, ఏబీ, ఓ. తిరిగి వీటిలో రీసస్ (ఆర్‌హెచ్) ఫ్యాక్టర్ ఆధారంగా పాజిటివ్ లేదా.. నెగెటివ్‌గా వర్గీకరించారు. ఓ నెగెటివ్ గ్రూప్ రక్తం విశ్వదాతగానూ.. ఏబీ పాజిటివ్ విశ్వ గ్రహీతగానూ పేర్కొంటారు. మానవ శరీర బరువులో దాదాపు 7 శాతం వరకు రక్తం ఉంటుందని పరిశోధకుల అంచనా!

రక్తం గురించీ ఒకమాట! రక్తం ఉపయోగం.. దాని స్థితి ఏంటో ఒకమాటలో తెలుసుకోవాలని లేదా? అయితే చదవండి. రక్తం ఆపదలో ఉన్నవారి ప్రాణాలు కాపాడుతుంది. దాదాపు 473 మిల్లీ లీటర్ల రక్తం ద్వారా ముగ్గురిని ప్రాణాపాయ స్థితుల నుంచి కాపాడుతుంది. ఒక సగటు వయోజన వ్యక్తి బరువులో 65 నుంచి 80 కిలో బరువులో దాదాపు రక్తం 4.7 నుంచి 5.5 లీటర్ల వరకు ఉంటుంది. మనిషి జీవిత కాలంలో గుండె దాదాపు 1.5 మిలియన్ బారెల్స్ రక్తాన్ని సరఫరా చేస్తోంది. గుండె ప్రతి హృదయ స్పందనలో దాదాపు 55 నుంచి 80 మిల్లీ లీటర్ల రక్తాన్ని సరఫరా చేస్తుంది.

ఏ పాజిటివ్:
వీరు నాయకత్వ లక్షణాలు కలవారు. ఏ- పాజిటివ్ రక్తం ఉన్న వ్యక్తులు బయటకు బక్కచిక్కగా.. సాధారణంగా కనిపించొచ్చు. కానీ వాళ్లలో బ్లడ్‌గ్రూప్ తెలిస్తే అసలు విషయం కనుక్కోవచ్చు. నాయకుడంటే పరిపాలనాదక్షుడు. సన్మార్గంలో నడిపేవాడు. ప్రభావితం చేసేవాడు. నాయకత్వాన్ని వెతికి నేర్వడం కంటే.. అది మన రక్తంలో ఉంటుందని గ్రహించాలేమో!

ఏ నెగెటివ్:
వీరు కష్టపడే మనస్తత్వం కలవారు. కష్టం కంటే పనిని ఇష్టపడేవారు అనొచ్చు. చూసి కష్టాన్ని ఎలా ఇష్టపడాలో తెలుసుకోవచ్చు. ముఖ్యంగా మెరిసేదంతా బంగారం కాదు.. మోగేదంతా కంచు కాదు అని తెలుసుకుంటే బావుంటుంది. ఎందుకంటే బంగారంలా కనిపిస్తుందని వేరేవాళ్ల మెరుపు కోసం.. మెప్పు కోసం కాకుండా కష్టపడుతూ స్వయంగా ఎదగడం నేర్చుకోవడం కోసం.

బీ పాజిటివ్:
త్యాగం చేసే మనస్తత్వం కలవారు. త్యాగాన్ని కూడా త్యాగం చేసేవాళ్లన్నమాట! బీ పాజిటివ్‌గా ఉంటేనే ఇది సాధ్యం అన్నమాట. రక్తమే కాదు.. మన మనసూ బీ పాజిటివ్‌గా ఆలోచిస్తే ఇక నువ్వెన్ని త్యాగాలు చేసినా సంక్షోభం రాదు. నీ మనసు నిండా సంతృప్తి నిండి ఉంటుంది. మంచి వ్యక్తిగా.. తెలివితేటలుకలవానిగా.. నిజాయితీ కలవానిగా ఎంత త్యాగం చేసినా మనసు కరగని వెన్నలానే ఈ బ్లడ్ గ్రూప్ వారు ఉంటారన్నమాట.

బీ నెగెటివ్:
వీరు పరిస్థితులతో కాస్త సర్దుబాటు కాలేరు. వీళ్ల రక్తమే నెగెటివ్ కదా.. అని కాదు.. బ్లడ్‌గ్రూప్ మిమ్మల్ని ఇలానే ఉండమని చెప్పట్లేదు. కూడా మారొచ్చు.. పరిస్థితులను అర్థం చేసుకోవచ్చు.. మార్చేస్తే మారుతారు సామీ అని చెప్తోంది. సర్దుబాటు అవ్వడం అనేది రక్తాన్ని.. దాని గ్రూపును బట్టి ఉండకపోవచ్చు.. చుట్టూ ఉన్న మనుషులు.. పరిస్థితులను బట్టే ఉంటుంది కదా.. అందుకే బీ నెగెటివ్ వారు సర్దుబాటు కాలేరు అనేది సర్వేలు చెబుతున్నా.. ఇందులో పూర్తి వాస్తవం లేకపోవచ్చు.

ఓ పాజిటివ్:
ఈ బ్లడ్ గ్రూప్‌వారు చురుకైన మనసును కలిగి ఉంటారు. ఏ విషయంలోనూ బద్దకిస్తే అది మనకే ప్రమాదం. నువ్వు చురుకుగా ఉంటే.. నీ జాతకాన్ని మార్చే మంత్రదండమేదీ లేదు. మనలో కొంతమంది మానవ సంబంధాల విషయంలో కూడా అలసత్వంగా.. నిర్లక్ష్యంగా ఉంటారు. కానీ మనుషులు దూరంగా ఉంటే ఏం ప్రయోజనం. మనసులు దగ్గరగా ఉండేలా చురుగ్గా ఉంటే ఇతరుల మనసుల్ని గెలవడమే కాదు.. మనం కూడా ఆనందంగా ఉండొచ్చు. ఇది ఓ-పాజిటివ్ వాళ్లకు మెండుగా ఉంది కాబట్టి నో టెన్షన్!

ఓ నెగెటివ్:
వీరు కాస్త అర్థంకాని మనస్తత్వం కలవారు! అయినా మీరే చెప్పండి.. అక్క మనది అయితే.. బావ మనోడు కాడా?.. అవుతాడు కదా. అలాగే వీరిలో అంత ఈజీగా అర్థంకాని తత్వం కాస్త ఉన్నా.. ఈ సెల్ఫీల కాలంలో చల్తాహై. ఓ-నెగెటివ్ బ్లడ్ గ్రూప్ ఉన్నవాళ్లు ప్రతీదాన్ని నెగెటివ్‌గా ఆలోచిస్తారనడం వాస్తవం లేకపోవచ్చు. ఇదే మీ బ్లడ్ గ్రూప్ అయితే.. ఒక్కసారి మిమ్మల్ని మీరు పరిశీలించుకోండి.. మీలోని క్వాలిటీస్ ఓసారి కర్టె చేసుకోండి. ఒక వేళ కాస్తో కూస్తో.. అవకాశం ఉంటే.. మీ మనస్తత్వం కాస్త మార్చుకోండి. ఎందుకంటే.. మీ నెగెటివ్ రక్తానికి ఎందుకు నెగెటివ్ పేరు తేవడం.. బీ పాజిటివ్ యార్!

ఏబీ పాజిటివ్:
వీరిని అర్థం చేసుకోవడం చాలా కష్టమట! ఇతరులకు సహాయం చేసేందుకు పుట్టారట వీళ్లు! ఈ గ్రూప్‌వాళ్లలో రెండు లక్షణాలున్నాయి. రెండూ వేటికవే భిన్నం. ఒక వ్యక్తిని ఏదో ఒకరకంగా అర్థం చేసుకోవచ్చు. కానీ కొందరు ఎంత అర్థం చేసుకున్నా అర్థం కారు. అందుకే మనలో చాలామంది వీడెంతకూ అర్థమవడురా బాబూ అని పెదవి విరుస్తుంటారు కూడా! ఇది ఒక లక్షణం అయితే.. ఇతరులకు సహాయం చేయడం వీరిలోని రెండో లక్షణం! కానీ ఇది మొదటిదానికి పూర్తిగా భిన్నం! మొదటిదాంట్లో నెగెటివ్ శాతం ఎక్కువగా ఉంటే.. రెండో లక్షణంలో పాజిటివ్ శాతం పుష్కలంగా ఉంది! కాబట్టి మీలో ఎవరైనా ఏబీ పాజిటివ్ ఉన్నవాళ్లుంటే వాళ్లను రెండు విధాలుగా అర్థం చేసుకోండి!

ఏబీ నెగెటివ్:
మెండైన తెలివి తేటలు కలిగి ఉంటారు! చూడటానికి చలాకీగా.. చురుగ్గా ఉంటారు. అందరితో చక్కగా మాట్లాడతారు. కమ్యూనికేషన్ గ్యాప్‌కూడా వీళ్ల దరి చేరదు. మన తెలివే మనల్ని కాపాడుతుంది. తెలివి లేకపోతే సకల సౌకర్యాలున్నా ప్రయోజనం ఉండదు. కాబట్టి ఏబీ నెగెటివ్ వాళ్లు ఇలానే తమ తెలివితేటల్ని ప్రదర్శిస్తూ భవిష్యత్‌లో మరింత ఉన్నతంగా ఎదిగేలా ప్లాన్ చేసుకోవాలి. దాంతోపాటు ఇతరులను కూడా అభివృద్ధి చెందే విధంగా ప్రోత్సహించాలి. ఎందుకంటే ఏబీ నెగెటివ్ గ్రూప్ వాళ్లు అన్నీ తెలిసిన తెలివిమంతులు కదా!